شريط أخبار
بقوا نمرة ف شريط أخبار!
عدد يزداد ف كل نهار
حصار ودمار
ويا للعار
على أمة فيها فوق مليار
دقيقة حداد!
على شعب برصاص بيباد!
ده عمر حداد ولا يكفّي ولا يأثّر
أنا ح اكفر
بأن العالم الغربي عالم أحرار ومتحضّر
يا طفل العزة يا مرابط
على ثغري
يا طفل الغزة يا رابط
شريط الحزن فوق قلبي وعلى ضهري
كبير يا طفل بصمودك
وأصحاب المعالي صغار
شهيد يا ابني
وكان مفروض اديديك تبني!
عزائي يا برىء إنك
ف جنة خلد ذات أنهار
فيها جنة جديدة هناك بتتشكل أيا خيّة
ما يدخلها شيطان أرضي بقبضة ظلم
أو بحصار
فيها يوسف
جميل وابيض بشعره الكيرلي
من دمه كفوف الجنة تتخضب
ومن ريحته بتتعطر
أنا ح اصبر
وعهد عليا مش ح أنسى
ليوم ما ح اصلّي ف الأقصى
ساعتها بس ح نقول إحنا خدنا التار
ساعتها بس يا ولادي
ح تبرد في قلوبنا النار.