ياتل قلبي تلت الجمس بثنين
لاحن قيره للدروب الطويله
عقب الغزال مكمل الوصف والزين
من اصبع اقدامه الين الجديله
عقبه وانا حالي تردت يبوحسين
ودي بشوفة كامل الزين ليله
ابوعيونٍ كنها عين شاهين
الناعسات الداعجات الكحيله
ولا الخدود تقول ورد البساتين
امحوّفه المبسم بصوره جميله
لبى الثنايا لاضحك شيّب العين
مصممه تصميم مافي مثيله
وهاك الردوف تقول كفت ميازين
لاجا يتثنى واثقل الوزن كيله
سمح المحيا زين طلق الحجاجين
ياسِعد منهو حضرته يهتوي له
توه صغير السن غض النهيدين
صوّبني بقلبي وشب الفتيله
وش عاد لو وصّل حدود الثلاثين
بيقبض على عقلي ويخلي سبيله
محلا وصوفه كلها فل ابشين
بالمختصر ياوين تلقا موديله
لوتجلس تدور بكل الميادين
لوتاصل المغرب تروح تعني له
ازريت تلقا مثلها اوشبيهين
لانه حلاة الشي ندرة فصيله