قلت من قلبي أحبها وكل خلق الله سميعه
أنا مو بس أحبها والله بحبها مجنون
أموت في سواد شعرها والعيون الوسيعه
بدوية أصيلة وأنا بجمال البدو مفتون
الزين لحسنها عبد تشتري فيه وتبيعه
تذبحك رقتها وتسبيك بنظرة من رمش العيون
تذوبني بصوتها وهمسها لو تخاطبني أطيعه
تطلب عيوني فداها وعلى كل العمر بتمون
سبحان ربي صورها في محاسنها بديعه
مكملة في وصوفها ينور من جمالها الكون
تتغلى وتتدلل وتترك نارها بقلبي وليعه
هذا الدلع إما بلاش عنيدة وفي دلعها فنون
بجمالها تهبل وأصل الحسن تملك مجاميعه
يسكن فيني غلاها وبالغلى انا مفتون
ولا شافتني تغض نظرها وتمر بالخطوة سريعه
فديتها بعد عمري وناسي اللي لها بقلبي سكون
أتحرى هلالها ونفسي بالشوق ملهوفة وجذيعه
مثل قيس العامرية في حبها مجنون
من يومي أهواها والعشق ما أحلى توابيعه
يكفيني حبها في دنيتي وفي نبض قلبي تكون
ويوم المنى بعلنه للجميع وفي الإذاعة بذيعه
لأجل الكل يبارك منك المال ومنها البنون
احتري ذاك اليوم وأعد شهوره وأسابيعه
ومهرها ما هو ذهب وياقوت وكم مليون
مهرها أرخص له روحي وكل حلالي جميعه
تستأهل كل غالي ونفيس لو يسوى مال قارون
واحمد الله أني بدوي واسمي دائم في الطليعه
يحفظها ربي اللي لأجلها سموني عاشق نون