يا صاحبي جيت لك عندي نصايِح سْمَان
عسى النّصيحة توَرِّدْ بِك على فالها
اخْشَى الْوِليّ الكريم الوَاحِد الْمُسْتعان
اللّي تْعَلِّق عليه قْلُوبنا آمَالها
من يَجْزي السَّيِّئَة سَيَّه ودايم بْشان
وبالْحَسْنة الله يجْزي عَشْرة أمْثَالها
في الصّمْت حكْمه وفي صَمْتك وقار وْضمان
والفِتْنه احْذَر تكون إنسان نَقَّالها
لا تْقول سَوَّى فْلان وْلا تْكَلَّم فْلَان
إنْ جيت وانْ رِحْت خَلّي النّاس في حالَها
اليوم دَايِن وباكرْ يا رفيقي مُدَان
جَنِّب لِسَانك عن الزَّلَّة ومَوَّالها
ولا تْقول جَدِّي مَلِكْ وابُوْي نَسْل الْحِصان
ومَعارك الْمَرْجلة أسْلافي أبْطالها
أفْعَالك أصْلًا تخَلّد سُمْعتك للزّمان
والنّاس ما تَمْسحك من ذاكِرَة بَالَها
وكانَكْ تريد الحياه بْدُون ذِلّ وْهَوَان
احْذَر صلاتك - تْمُوت بُكْره - إهْمَالها
وفي والِدَيْنك تلاقي جَنَّتِك والأمان
رِضَاهُم أكْبر من الدّنْيا ومن مَالَها
وطُول العمر والْغِنَى قِدَّام عينك يْبَان
لا تِقْطع الرَّحْم واسْعى دوم بِوْصالَها
واحْذَر صديقك وجارِكْ لا تِجيهم جَبَان
ولا تْخُون فيهم.. ونَظْرة عينك اغْتَالَها
الموت فَجْأه.. وْحِنّا في الحياه امْتحان
في الآخِرة كلّ نَفْسٍ تَجْني أعْمالها