ياهن وش فيهم علينا الموارد
زادو علينا نصف ساعه وساعه
هو من غلانا الي مع الناس شارد
ولا هوى المبغض مع الناس شاعه
لو هبت الفرقا على القلب صارد
عندي على فرقا الحبايب مناعه
وياما لنا في كل صادر ووارد
في وقتنا الماضي وهذا قناعه
وياما وياما فوق خضر المفارد
نطوي مسارينا عليها شجاعه
والنذل خفاقه من الجوف شارد
قلبه ليامنه لقانا رعاعه
حلقت حلمي فوق كوكب عطارد
ومشيت دربي باختياري وطاعه
لو قيل من ينطحك سلطان مارد
قل كل شاة معلقة في كراعه
وش حيلتي لو طول الليل بارد
ووش حيلتي لو قصر الوقت باعه
اصبر عسى الله يجعل الخير وارد
ويكفيك عن ضيق الخلايق وساعه
وصلاة مولانا وهو خير شاهد
على نبي الملحمة والشفاعه