البارحه دمعي من الشوق غرياف
تصرمت حتى عروق النوامي
نبض الوتين الي من الوجد رجاف
زلزل جدار الصمت باقي كلامي
خل الحنين الي على قلب ميلاف
والله ما يسوى طلقةٍ من حزامي
حملت قلبي بالسواعد والاكتاف
ودفنت باقي سلوتي وانسجامي
ثلاجة الموتى وونان الاسعاف
تدوي براسي حول عشرين عامي
والقبر والي فوقه اثنين وقاف
قصوا جواز لفرحتي واهتمامي
يا عين ليت الجرح فالصدر ينشاف
كان الجروح استنطقت بالاسامي
شمعة حياة وفارقة طبع واوصاف
ما سيرت عقب البطا في منامي
ما عاد ينفعني مشايخ وعراف
النفس طابت عن دروب الغرامي
يا ناس خلوني على جال مهياف
اضل واتبع وحدتي وانفصامي
ولا بد تلقوني على كل ميقاف
بغداد ياصلها القعود التهامي
مشاعري تصعب على الوزن والقاف
بغيت اترجمها وعيا مقامي