يا بو فهد لا تلومني لامني شديت الرحال

يا بو فهد لا تلومني لامنّي شديت الرحال

ما عاد لي في ديرةٍ أهل الحسد يا طونها

قومٍ غثيثٍ مذهبَه والحال ما فيها مجال

ابحث خوافي سيّئة وأبوح عن مكنونها

باطنها خبث ومصلحه، ظاهرها رزّة ارتجال

بالعين تبدي حبها بس البلى بعيونها

تعجب بزين أخلاقها وتقول ما مثلَه مثال

واليا عرفت لشونها، مبطي مْخبور لونها

مالي ومال الطامنة وأنا انتمائي للطوال

اشفق على نيل الثقة من قوم الها وزونها

ودي رجالٍ صادقه ماهو كلامٍ في مقال

عزاز نفسٍ ترخص الغالي للي يبونها

مثْل الشيوخ اللي تذرّي مثْل ما تذرّي الجبال

صميدعيّه تعجز الفرّيس لا ياتونها

ومثْل الرجال اللي خذت جود وفراسه وطيب فال

رجال موقف كسْبت السمعه بقوّ حصونها

سيرة بطل قصة صبر كتب وآلت للزوال

ما عاد إلا قلةٍ … أمن البشر يقرونها

راحت علوم المرجلة مع وقت صعبين المنال

وجاتك علوم المصلحة في وقت من يبغونها

يا بو فهد خذ هالعبارة واقبلَه يابن الحلال

وان كان ماهي وافيه اشره على اللي يصونها

لو فيه ميزه نايفه ما ياصلَه كود الرجال

بتْشوف يا كثر العرب اللي تْهفي من دونها

هذي الرسالة وْصلت من غير لا قيلٍ وقال

وان كان تجهل قصته يكفي ترى مضمونها