آه يا زمان الخنا
يا ماشي بالمعكوس
فيك أى شئ ينشري
وكل شئ بفلوس
حطيت عديم الرجا
ع الخايب المتعوس
خراب وحاكم أغا
يا قهرة العارفين
ركب الأغا ع البلد
ركب عليها الخوف
خاين قليل التنا
جاهل عديم الشوف
خان التراب والهوا
خنق الضمير ف الجوف
وداس بنعل الوطا
علي الحقو العارفين
مين في البلد يا بلد
كان صوته من راسه
يحسب يكيد العدا
ويصون وداد ناسه
دار المدار بالخبل
وسقانا من كاسه
مين تحت حكم الأغا
ينطق يقول عارفين
ياللي قريتوا الجرايد
كله كلام مغشوش
ومركبين في الصحافة
بتوع وليها كروش
يدوسوا زر البتاعة
ينزل كلام مطروش
حمضان في حبر المطابع
وكلنا عارفين