دايما بكون زعلان

دَايْمًا بَكُونْ زَعْلَانْ

لَمّا الذّنُوبْ تِكْتَرْ

وأمّا بَشُوفْ إِنْسَانْ

عَ النّعْمَة يِتْبَتّرْ

لَوْ كُنْت مَرّه بَشُوفْ

إِنْسَانْ بَدَأْ يِسْكَرْ

بَأْمُرْ وبِالْمَعْروفْ

وأنْهَى عَنِ الْمُنْكَرْ

وأمّا بَشُوفْ مَظْلُومْ

لَازِمْ أَكُونْ جَنْبُهْ

لَوْ كَانْ ضَعِيفْ مَعْدُومْ

طَبْ هُوّ إِيهْ ذَنْبُهْ

وِإنْ كُنْت مَرّه بَفُوتْ

عَلَى نَاسْ بِلَا شُغْلَةْ

بَصْرُخْ بِعِلْو الصّوتْ

مشْ وَقْتِنَا أَغْلَى

وأمّا بَشُوفْ مَهْمُومْ

بَاكِي عَلَى حَالُهْ

دَمْعَة عِينَيّ تْقُومْ

فِ ثَوَانِي رَيْحَالُهْ

وأمّا بَشُوفْ فَرْحَانْ

بَفْرَحْ مَعَ فَرْحُهْ

وأمّا بَحِب إنْسَانْ

بَحْكِيلُهْ وبَصَارْحُهْ

لَوْ مَرّه شُفْت فِ يُومْ

مُبْصِرْ لَكِنْ أَعْمَى

مِ الْعَقْل كَانْ مَحْرومْ

بَشْكُرْ عَلَى النّعْمَة

وأمّا بَكُونْ قَلْقَانْ

بَتْوَضّى وبَصَلّي

بَلَاقِي مِ الرّحْمَنْ

الرّاحَةْ تِوْصَلّي