مسٍ قلب في يوم كل الموازين
والمجتمع بأيام غير نظامه
عزمه قوي مع انه صْناعة الصين
ولو له عظم يمدي كسرنا عظامه
اصغر من الذره ولا تلمحه عين
ماتسبره بالعين زرقاء اليمامه
مايعرف الزهراء ولا يعرف حسين
ولا يهاب اللي يحط العمامه
لا مر واحد ينسخ الواحد اثنين
ولا يبين بالمصوّب علامه
خلى كفوف المرجل مغطيه زين
وخلاه مايطلع بليا لثامه
وخلى المسالم بالنظر بالدواوين
من السلام الناس تبغى السلامه
وخلى الكحول بكل لحظه بالايدين
ولا يلحق الرجال منها ملامه
وخلى البضاعه غاليه بالدكاكين
اما الذهب ماعاد يسوى جرامه
و فرق بعد بين الاهل والمحبين
اللي طلع واللي بقى في دوامه
منه المساجد مادخلها مصلين
ومنه الاذان اصبح بليا إقامة
و طلع لنا تجار للدار وافين
وطلع لنا تجار وانت بكرامه
قد قالها اللي ما لقوله براهين
مسرد رغم كذبه عجبني كلامه
لو بعضهم يدري متى الساعه تحين
غلّى المصاحف قبل يوم القيامه