يطول ولا ما يطول غيابي
اعوف ويقول الشعر ما اعوف
جيت لحداثيه وتقليديه
بعد الكسور وقافي المعسوف
قبل اتمنى امسيه شعريه
يوم التمني مجلسٍ محفوف
أقصى طموحي فيه ( صح لسانك )
واصبح مع تيارها مجروف
ثقل الأمانه حمل ( ذيك الكلمه )
والشعر مايستقبلك بدفوف
من يوم ثقّل كاهلي ( تغريده )
و نشره تعلق بين ( ليت ) و ( سوف )
بالشعر ( شيخات القصيد) اغنتني
وكفيت همٍ ماهو بمكفوف
وشبيت عود ازكى قصايد ( متعب )
و غنيت شعر ( الاسلمي ) في ( نوف )
يا صاحبي قرب وهاك علومي
سوالفٍ منت بها مكلوف
اسمع و سمع كل اذانٍ صقها
قولٍ وكاد وما وراه حلوف
ترا المهذري بالمراجل دايم
ماهو رجل لو شنبه معكوف
اما الردي عرفه ردا والطيب
معروف لين يمنّ بالمعروف
واذا نخيت اللي بليا نخوه
تراك اهنت عقالك المحذوف
واذا تخاف الموت .. ماهي مْصيبه
اكبر مصيبه لاذبحك الخوف
و خل الطمع واقنع بشكلٍ مقنع
كثر القناعه ما روت ملهوف
ولاتصدق ان عصفور واحد بيدك
اخير من . . . باقي المثل معروف
كنز القناعه لاملكته كله
ماراح تلقى في يدك مصروف
وبلغ من يفاخر بكثر املاكه
حتى العدم يملك ثلاث حروف
تتبدل احوال البشر في لحظه
ويقسى الزمان بثانيه ويروف
الشانق اللي شال راسه كتفه
لو ينشنق راسه يشيل كتوف
و الحي بعد الموت سمّي جثه
وزقايري بعد الرماد قطوف
تتغير الاسما مثل روتيني
لو عاشه ضعيف يقول ظروف
واصنع لنفسك حلم لو ما يعقل
واصنع لعقلك راي لو ( مكتوف )
يا تارد من العمر عمرٍ ثاني
ولا وردت من التراب حتوف
يلقى الذليل بذل نفسه راحه
دام الكرامه حرها بالجوف
اذا تحت ظل السيوف الجنه
حتى الكرامه تحت ظل سيوف
و خلك وكيل ادم على ذريته
اذا وكيل ابليس حافك حوف
واطلب من الله الستر للعالم
من واحد بعرض البشر مطروف
غض القمر نوره بعد ما مرت
سحابة فيها الحيا مردوف
وسوادها يبكي حيا من نظرة
برقٍ يخلي سترها مكشوف
والمجتمع يجمعه وازع ديني
لو كل ساعه يعصفه عاصوف
قبل تلوم اللي رمت شالتها
لوم الوضيع اللي لبس نفنوف
الخير قوى من عزومه خارت
والذنب فيه الاقوياء ضعوف
وانا الضعيف اللي تقوى بالله
من يتمٍ بكلمة يبه مخلوف
اللي يقول ان البشر نسايه
ما صادفته من الزمان صدوف
هذي سنين تمر ما نستني
ذاك الشعور لقلبي المرجوف
غيبة من محياه راحة خاطر
وصدره سما طيب و يديه قنوف
ماقلت افٍ في حياته لكن
للحين بغيابه اجر الأوف
تنازع الارواح من ينزعها
وتعيش حاله حالة المخطوف
الا هذيك الروح لانت بيده
في قبضته كانت زهر مقطوف
ياليتها تلمح وارد اغرسها
في صدر مملي دمعي المذروف
عجزت اصدق غيبته صدقني
شعورها خارج عن المألوف
كني طفل نايم و فاضت روحه
يموت ويحسب الممات طيوف
ياصاحبي للماضي انت مقيد
ومستقبلك من حاضرك مكتوف
حتى دروب الحب ماهي منجى
طريقها بشكوكنا مرصوف
لا كبر الحب القديم وصلى
توقف وراه الذكريات صفوف
جاني كأنه صوت اذان وجيته
بدموع تايب كلبوه حسوف
صعبه اقص كفوف من يسرقني
لاصار يسرقني بدون كفوف
يسرقني بطيبه ورحمة قلبه
وبضحكته وبصوته المعزوف
ريم بفلا القلب ونهر شريانه
خشفٍ يقود اللي يقود خشوف
باول لقى عيني بعينٍ نجلا
وبمبسم وساعة ومعطف صوف
و في ذكرياتي تمسك ايدي ايده
يوم اتذكر ، ، من بعيد اشوف
يقول بعد الحور منهو اجمل
واقول مابالحور منك وصوف
لما النبي وصف نعيم الجنه
كان اجمل الواصف من الموصوف
لسان عاطفتي سمعه بعقله
والعقل عن صوت الشعور ينوف
قبل يغيب الحس غاب احساسه
راح وتركني للوصل ، ، مشغوف
لي شف بعناقه و حكي اعماقه
لي شف لكن للزمان شفوف
ياصاحبي
وين الغرابه قلي
باللي من اول ما ولد موقوف
يضحك من الحرقه .. و هو في صغره
عن لمسة الجمره ترده ( اوف) !!!
لاضاق سلى خاطره باشعاره
قافٍ له تصير الجلوس وقوف
مستغرب ادري وادري ان شعورك
بين الطمأنينه وبين الخوف
الرف يشعر بالكتب لو مره
حس الجدار انه يشيل رفوف
والمبصر عيونه تشوف الواقع
وعيون الاعمى بالخيال تشوف