نعش الشعر دقيت لي فيه مسمار
لي عام ابيه يموت و سنينه تزود
يمر بالي بالعشي وبالابكار
ماغير يتردد ومن غير مردود
مع ان له عند الرجاجيل مقدار
وان عدوا الجزلين تلقاه معدود
سطحي قصيدي ياصل لسطح الاقمار
وعمقه مثل تفكير ابن فيصل . . سعود
مثل البشوت فبيعة طوال الاعمار
ما هو ب زل عروس كل يوم ممدود
واللي يحد الهاجس لبعض الاشعار
لي قلب و من الوقت له وقت ملهود
الصاحب ليا جار له حشمة الجار
وان صك بابه دونه الباب مردود
لكن ابو وجهين وياه محتار
كيف احشمه ووجيهه ثنينهم سود
لو منه الزله ادور له اعذار
ولو مني الزله علي دور شهود
و الضيق ماينفك في فكة زرار
الضيق هو واشباهه بصدري رقود
شايف بدنيا الفقر عزه وايثار
وشايف بدنيا المال عابد و معبود
محدود دخل الطيب معشي المار
وشح العفن والدخل ماهو بمحدود
رجلٍ يصر المال لايقرا الاذكار
على البخل مافيه رجال محسود
طبع الجشع حتى اذا بالقبر صار
يمكن هو اللي بالقبر ياكل الدود
عيني تشوف وحظي ايدينه قصار
وماكل ماينشاف بالكف موجود
موعود خير اكعم بها راع الاشوار
وانا من امي بس بالخير موعود
انقتلن الآمال في عمر الازهار
وكفنتهن بالصبر ولصبري حدود
و غلا القتيل وقدره يحدد الثار
يا زاد ولا ثار له ملح بارود
وان كنت انا مجرد من احلامٍ كثار
السيف يظهر فعله ان كان مجرود
مهماالظلام يسود له عزم خوار
يعجز يطفي لمبه براس عامود
اشجع ظلام ... الظل ، وان شاف الانوار
يلبد ورى الاجسام حتى ورى العود
و يامن قصد له شي و بلحظه اندار
احيان يقبل شي ماهو بمقصود
واحيان شيٍ نافع يجيب الاضرار
واحيان شيٍ ضار تلقى به الفود
اذا هبوب النود تحيي لك النار
نار الشموع تموت من لاهبت النود
و انا برجوى ثالث اثنين بالغار
اني من السبعة ولا اكون مقرود
ياحزن فيك ونعم باسل و مغوار
لكن خصيمك ماعلى ضحكته زود