ياللي غلاك وحسن خلقك اسرنا
ملكتنا في حسن خلقك ومبداك
طالة علينا غيبتك وانتظرنا
على أمل نفرح بشوفك ولقياك
من غبت عنا كل ذكرى تحضرنا
نسمر معاها بغيبتك مانسيناك
انت الوحيد الي حنانك غمرنا
عطفك علينا مايتكرر وشرواك
ارجوك لايطول الغياب وسهرنا
عيني تحارب نومها عند طرياك
دنياي تظلم عند غيبة قمرنا
لوكان شمس الكون تشرق بالأفلاك
لولاك والله مانتظرنا وصبرنا
على الهموم وضيقة الصدر لولاك
قلنا نبي ننسى الشقاء ماقدرنا
لكن رضينا في قضى الرب انا افداك