بعض البشر يلبس الشرهة على راسه
يشتلها من على البيداء ويرفعها
خالي من الطيب من راسه إلى ساسه
والحنظلة دوم يسقيها ويزرعها
دنفوس منكوس ضاري بالتدنفاسه
كورة مع الناس بالأقدام تدفعها
ويا كثر غله مع حقده ووسواسه
صفات الأنذال في نفسه مجمعها
وبنّه وهيله ومصفاته ومحماسه
للضيف والجار ما عمره يطلعها
إن شاف مبسوط حال يصيبه أعماسه
لا رزاق كنّه من جيوبه يوزعها
يا قل باسه لا والله يا كثر باسه
لو كان له حيل بأرض الله يقوقعها
على رجال الوفاء والطيب متراسه
وبغيبة الناس نفسه ما يجوعها
الوقت ما علمه حكمة ولا دراسة
مثل البهيمة تعشا في مراتعها
يالله لا تقرب إحساسي من إحساسه
وكل العلاقات به يا ربي اقطعها