كبرت وجف قلبي
وصرت قاسي
وصار الحب مفردتي القديمة
وعاطفتي ماهي ضمن اهتمامي
لأن القلب حاميها الحرامي
ولأن الحب ما وفّى وعوده
كبرت وجف قلبي
وصرت قاسي
وأنا اللي كل ما يحزن يغني
وأشيل هموم ناسٍ ما أعرفها
وكل مجروح أحط نفسي مكانه
ولا أطلب أحد يجي بمكاني
ويمكن لو أحد يبغاني أحكي
وأفضفض له أخاف يشوف ثاني
أنا مملي ألم مخذول جداً
وأرمم نفسي بنفسي وأعاني
أصير صغير بس لمى أسافر
أراهق وأركض وأسمع أغاني
وأشب شموع وأقصد وأتفلسف
وأجي أنسى وذاكرتي قوية
تحاصرني التفاصيل بثواني
وأحاول أعتزل وأعيش هامش
والاقي نفسي أعيش الأساسي
كبرت بعين حزني
ليت حزني
صغر حتى رجع على مقاسي
كبر فيني كبر
و أي ذكرى حلوة
تذكرني وأطالع فوق وأسكت
وبعد جهداً جهيد أقول " ناسي "
ثلاثيني أحاول قد ما أقدر
تكون أهدى أبي تمر بسلامة
أبي أحذف " أبي " وأعيش راضي
أبي قلبي يحب ويطير فيني
أبي ضحكة تذوّبني سعادة
أبي جليد وجهي يذوب فرحة
أبي حزني يضحكني بحزنه
أبي المركب يوصلني المراسي
أبي أنسان مني
أنسان فيني
أبي أنسان لي
وأنسان عني
أبي ألحق على عمري لأني
كبرت وجف قلبي
وصرت قاسي