أنت

أنتِ

وتشرين

يا متَشرِنه تشرين يا روحو

يا خمرتو يا مفتّقه جروحو

ورقات فرشتْ عالدرب نهدات

وورقات رقصوا قبل ما يروحو

سهرة حنين معبّقه حكايات

وزهرات عطر الليل بيفوحو

تشرين لجْلك لطَّف النسمات

وطلّعْ حَمام الدَّوح من دَوحو

حطّ السما عا مَرمرك خرزات

وطَرْفك فَرَش زيتون ع سطوحو

ورمَّانتين مدوّره آيات

كل ما الغصن بيلوحْ بيلوحو

نامي عصدري ولاعبي الدقَّات

أنتي وأنا والنَّهد وسفوحو

وخلِّي الأماني تصير غنّيَّات

دقات بيخَبُّو ودقات بيبوحو

مركب هوانا يضمّنا بالذات

لا مركب الطوفان لا نُوحو

نسرق ع غفله من القمر بوسات

ونشخبط بهالليل عا لَوحو

تشرين يا تشرين هات وهات

كرم الهوى المجنون وشلوحو

عمر المَلا بينقاس بالساعات

ساعة عشق بالكون وصروحو