لا تسألي كيفي

لا تسألي كيفي

حالي صَبَح عندك

متعلّق برسمِه

وغمّاز عا خدك

قولي: قلب حهلان

حطّ الوعي عالرفّ

راجع متل تلميذ

قاعد بأوّل صفّ

كلما سألتي: مين؟

بيفكّر قصدتيه

ينْدَه أنا حفظان

أيّا حرف قلتيه

قلتي: يا طفل كبير

أركز بقى وأهدا

شو علّقك بالبنت؟

وبخصرها ونهدا؟

يا طفل يا جاهل

أقعد بقى عاقل!

تحكي يا حلوه خْبار

عن بنت مختلفِه

وتسلّفي العينين

ألف وألف سلفه

وقلبي فقير الحال

هالحابس اللهفة

فكرو بعد رمشين

ياخد معك سلفي

يا تلج يا دفيان

من حاجب رسمتيه

لما كتبتي عليه

هالقلب دوّبتيه

نامي عَ كتف الصَّوت

واحكي حلم شفتيه

بلّي يباس الروح

بلّي العمر بلّيه

لو من ألف ديوان

وألفين تيه تيه

من ببن هالألوان

أسمك أنا بنقّيه

طيفِك صَبَح طيفي

طيفي صَبَح طيفك

لا تسألي كيفي

كِيفي على كَيفك