البنادم لو يكابر ترا حاله ضعيف
تفرحه كلمة بسيطة وكلمة تحزنه
شوكه تسهّره ويبات من نومه معيف
كيف يتجبّر ويطغى وهذا معدنه؟
طايع الشيطان والنفس لو قلبه نظيف
ما سعد بالعمر حتى يكفّن بكفنه
والربيع الزين لابدّ ما يقفاه صيف
والزمن دوّار والأدمي ما يضمنه
عادة الدنيا تلاعب مع العقل الخفيف
لو تبسّم للبنادم بغفله تطعنه
لو رصيده بالملايين ما تحوي جنيف
ما معه غير العمل يتبعه في مدفنه
والمقابر ما تفرق بسيط ولا شريف
كلهم للدود مهما تطول الأزمنة