على آخر رمق ف العام جا صوتك يهنيّني
بمولد عام.. أو يمكن يواسيني على احزاني
على الألفين ست جروح! شوفيها وشوفيني
قبل ما احاول اكتبها تجي يمي وتقراني
على الألفين ست دموع من عينك ومن عيني
تطيح بكل حزن وينكسر قلبك على اغصاني
دخيل البوسة اللي من شفاهك جت تصحيني
دخيل الكلمة اللي ما تعب من نطقها لساني
ذبحني ه الشتا العاصف بكل برود.. دفيّني
سماي ملبّدة.. غنّي دفاك بنوتة ألحاني!
أبعزف لك ظماي ولهفةٍ عيّت تخليني
مثل طير ف قفص.. بالله قولي.. ليش جنحاني؟
هي احزاني مثل ماهي ولو صوتك يهنيّني
بمولد عام أو حتى.. يزوّد فيني احزاني