ليتني في ليال الجرح صبري طويل
يمكن القى بعد صبري عليها فرج
لكن المشكلة حظي واعرفه بخيل
وانتي أبرد من الثلجة وحظك عرج
انتظرتك وانا قلبي يحط ويشيل
والقلق مثل دمي في وريدي درج
لا لفيتي سواة المنهل السلسبيل
ولاقطعتي وصار الحال مثل الحرج
ما قطعت الوصال وقلت كيف السبيل
لأجل اسبب لنفسي والكرامة حرج
من دخل عند حدانه يسمى دخيل
ومن خرج ما يسمى عند ربعه خرج
قلبي اكبر واجل وسهم قدك نحيل
وبحر الاحلام في بحر التمادي مرج
قلت لك والهدب يمطر وروحي تسيل
نبت الاشواق لا حس الهزيمة برج
لين صرتي زناد وصار قلبي فتيل
وصار للحب في هذا الخطا منعرج
باهت السور بعدك والمدى والنخيل
واصفر الشوك ينبت في حروف الدرج
كل ما وجهوا طرفي لبرق المخيل
كن ثعبان حبك في الحشى يدرّج
كم تمنيت من صدك يلين ، ويميل
وكم تمنيت من قلبك يشب الحرج
وكم تمنيت يوم ان التمني بخيل
لعنةٍ فالسكوت ولعنةٍ لو هرج
لكن الله يعدلها وصبر جميل
ما تضيق الحوال الا بعدها الفرج