ياسعود لاصكت علي الغلايب
قربت لي من نادر الذود طفحا
تشبه شديد العاتيات الهبايب
اللي هواها شامخ الحيد يدحا
ابصر عليها ياسعود الحبايب
وازبن مرابع زايد الخير رشحا
امشي على رمضا النفود العبايب
ماهمني من جلجل الصوت وافحا
هاذيك اليس وذي بلاد العجايب
فيها التلول يغرد الطير مرحا
اسمع نشيد الراسيات الغرايب
ينشد نشيده كل مابات واضحا
يشكي ثباته يوم غنت خرايب
يوم العقول الواعية عنه رجحا
كان البليد اللي عليه الطلايب
ارعد رعيد ابراعد الصوت ولحا
وعنز الفصيح اللي تدر الحلايب
حض الفليح امجنب القول جدحا
كم لي واقول للخاطر الود طايب
ودمي نزف قبل اكتب الحرف وامحا
ماكنت اقول لواقع الحلم غايب
لوكنت اقول ابعاد الاحلام نجحا
فيها جنوب الساكنين الندايب
يصبح شمال ابطرفة العين رفحا
كله سبايب فاتقين القطايب
اللي على ظهر المواصيل فشحا
ولاهمني ياسعود قل الصحايب
واللي يبون عيون ميثا ووضحا
لو زان لي طرد الخشوف اللعايب
رديت لولا الشيب راعية يسحا