يا معدية جدار الذل بصِدر شبابك،
ابنك جابِك حد الشط
انزلي.. دِبي خُطاك الثابتة
لملمي كل جراح أحبابك
راح الخوف.. خلاص انسيه
وخفافيش ليلك..
اللي بتسكن ليل وماضيه..
مرة في مرة راح يتلموا
وعزم ولادِك راح ينهيه
بكره الحق يعود لسماكي
ويؤول ظلم الظالم لِيه
سحابة وماضيه
مهمن يطمع فيك واتغابى أي طموح
ولا ان خلِف على أطرافِك موت وجروح
لاَبِس كاب.. أو جلباب
لاَبس وش.. أو دقن بغش
بكره الليل.. راح تنسِيه
وجميع عفاريته اللي عطاها وطننا الغالي تلعب بيه
اللي استهدى.. واللي اتخبى..
واللي ف ايدُه قطوع يحمِيه!
واللي اتشعلق ع الحبلين
قصدُه ينافق.. اللي مسابق بخُطى أبيه..
زي غزالة ف غابة شوق للحرية
كلُه حيركع تحت أقدامك.. وأنتي بنفسك حتصَفِيه
يا معدية جدار الذل بصدر شبابك
مش راح نسمح تاني يعود قهرك وعذابك
وتاني نغني معاكي نشيدنا
سَمي وخطي.. أوعي توَطي
عدي.. يا ريح التغيير.. عدي
في حما ولادك.. انسي ما فاتك
الحرية فيكي غريبة.. بس.. قريبة
بكرة حتصبح جوه أحضانك زي حبيبة
مادُومتي هزمتي الخوف جواكي
سَمي وخطي أوعي توطي
اللي يطاطي لظالم عمرُه يصبح.. واطي
واللي يقول للجائر لاء..
التحرير يفتح لُه أبوابه
وسقف مَطالبُه يزيد ويزيد ولا يخرج فاضي
الحرية فيكي غريبة بس.. قريبة
بكره حتصبح جوه أحضانك زي حبيبة
مادُومتي هزمتي الخوف جواكي.