فيه الف ايد ويد مرفوعه قدامي
طالباني اشوف الكف واتهجى عنواني
وانا جوا مني الف حرف وحرف
خايف ليظهر ضعفه ف يعاني
حالف عليا ميت يمين ويمين
إوعاك تميل في الشده من تاني
إوعاك تلملم عشرتي وملحي
وتحرق شمعتي وفي الضلمه تنساني
عارف زمان والمعنى في حروفك
يرسم شعاع للأمل بتهد بيه خوفي
عُمره ما قَيِّد جُمله أو معني
حرر مشاعرك تحكيني بظروفي
وانا كنت أقول الشعر من خوفي
واحفظ رسايل فى قلب مظروفي
من همي بكتب شعر أحكيله وأشكيله وافضفض جوا أبياته
فيشكيني ويبكيني ويوصف دمعي وخسوفي
واكتب ساعات لو ضحكتى واضحه
وارسم شعاع الشمس ودنيتي صابحه
واكتب كتير عن كل أحوالي
أكتبي لفرحي ودمعتي وخجلي
و اشرح واصلح ضعفي وكسوفي
خايف ل وزن الشعر يكسرني من دمعه
يبكيني بين الناس في الوصف والمعنى
من كتر خوفي الشعر بيداري
فكره مكسوفه من ضعفي و ممانعه
كل اما احاول ربط افكاري
بيشدني الماضي لِحَضرته شد
كل اما ابني بحرفي سد متين
من كلمه واحده حلمي بيه بيتهد