اليوم شفت إنك ضعيفاً يالانسان
فيروس ما ينشاف دمّر غرورك
حاجرك في بيتك برهبه وحقران
غازيك بآمر الله وبيّن قصورك
وين المصانع والدكاتر والأوطان
وين السلاح اللي طغى في شرورك
جيوش ما تقواه لو هو بميدان
وشلون لو هو مع صديقك يزورك
كل الملوك اللي توّلت في بلدان
من خشيته تمنع عليها عبورك
خلّا سلام الناس يصبح بالأعيان
وألغاك يا ابن آدم وحجّم بدورك
وتباعدت جيران وانعزلوا إخوان
محروم من دنياك وأبسط أمورك
وين الحبيب اللي من الحب هيمان
ما عاد يا خله يبي شوف نورك
حتى الصديق اللي يريدك وولهان
ياللاسف خايف وكاره حضورك
والداهية مسجدك مقفل ببيبان
اللي تصلي به وتلقى سرورك
واليوم في هماً تثاقل بالأحزان
ترجي من الله بس يرجع ظهورك
احذر بعدها. لا تكّبر يا إنسان
اعرف مقامك وابتعد عن فجورك
واقرأ عن النمرود فآيات قرآن
ثم اعتبر لا تصير عبرة عصورك