كنت فين
كل السنين اللى عدت زى دهر؟!
كنت فين
وفجأه راجع ترمى لعبة شوق بزهر؟
م خلاص دا كان
راحت معالم المكان
الأوادم والبيوت كل شىء
كل شىء طاله الزمان
مش باقيلك إلا ذكرى
قاسية.. ناقمة
ع اللى كان
كنت فين؟
الحيطان صابها العفن
الشباب صابه الوهن
الصور.. أصفر لونها
والحياة من يوم م فُت
قَفِلت.. للعين جفونها
والربيع فارق أوانه
زهرنا ف صباحُه ميت
ف صباحُه ميت فوق عيدانه
هاجرت مُدننا م الوطن
كل شىء طاله الزمن
كنت فين
وجاي تانى تقول نعيد؟
إيه اللي جد جديد يفيد؟
أيه اللى جابَك؟
اللى جابك لو ندم؟
إنهارده..
يعمل ايه فينا الندم؟!
يحيي ميت من عدم؟!
يحيي ايه ولا ايه ولا مين؟
إنت ميت
لك ف عيني قول سنين
دلوقت بس
بعد قلبي ما مات ف حبك
إفتكر قلبك وحس؟!
ما إنتظرت كتير زمان
كل شط..كل مينا
كل ساعي بريد يجينا
يقولي أسف..مش بايدي
ليه يحسوا هُما بيا
وأنت ليه يا أقرب ماليا
ليه تجافي سنيني بس؟
دلوقت بس؟!
أرحل
أرحل وأعمل فيا جميل
جميل لو مره
أتعودت رحيلك
ورحيل الذكرى المُره
أرحل قبل
مايصحى القلب وتاني يموت
قلبي ان شافك
اللي باقي ف أيامُه.. ازاي
أزاى ه يفوت؟!
كنت فين؟
وكان لى فين اللى إنكتب؟
أنت مُري.. اللي عشته
وحزن قلبي..
كنت فيه أنت السبب
كنت فين
وتانى راجع ترمي لعبة شوق بزهر؟!
كنت فين
كل السنين اللى عدت زي دهر؟
كنت فين؟!!