مرحبا يا طلّة البدر المنير
يا هلا بالورد وانفاس العطور
الخفوق من الفرح وده يطير
جَيّتِك خَلّت أحاسيسه تثور
في حضورِك تصبح الصحراء غدير
وترتوي في القلب يِبَّاس الزهور
وتنبت الأزهار ويفوح العبير
وتمطر الأشواق ويعمّ السرور
حسبك الله يا ظبي سودة عسير
كيف طوَّعت المشاعر والشعور
كيف صِبْت القلب واصبح لك أسير
بالعيون اللي مثل موج البحور
لا تحنّ ولا تسمِّي وتستخير
قبل لا ترمي هدفها ف الصدور
من يلوم الزين والحسن المثير
ما يلام الريم لو صابه غرور