ملامحك في غيهب العمر يا وجهٍ جلى
شكّلتها من ماي قلبي وطين الذاكرة
فيما روت جدب الخطايا عن الما والكلا
وانا اتوهم ذبحة الشك واقطع دابره
ترعى خيالي شرّد البال واقرا ما تلا
شيٍ قديم من التفاصيل ماني فاكره
قلت اسردي يا شهر زاد الحقيقة للملا
مشبوه بالحيرة ومنفي عن اول واخره
لا الصمت يسعفنا ندوّر على انفسنا .. ولا
هذا الحديث يرد ماضي لقانا حاضره
قالت خذ الموضوع بين التراضي والغلا
وان ما خذيته لا انت خاسر ولاني خاسرة
وامعنت في نجمٍ تكسّر على ظهر الخلا
نوره طفى تحت الثريا .. وناره سافرة
لين اينعت في صخرة الياس ريحانة غلا
وابديت عن شرح الكتابة نسيج الخاطرة
وان كنت بالنسيان سميتها " دفعة بلا "
سمي حوادثها على قد ما انتي ذاكرة
وشلون ينسى وارد العد ميّاح الدلا
لا شلهبت كبد الصحاري سموم الهاجرة
تبقين ما ودعْك صدر المحب ولا قلى
يا ضحكةٍ ما تشبه الا القلوب النادرة
شكلتها من ماي قلبي وفازت بالولا
واخْذت منابتها الندية بطين الذاكرة