يالشمس ليه انتي عليهم تضوين
وانا الذي كنت احسب انك عشاني
الصبح جابك لاجل فيني تهلين
واخلفتي وعْودك بظلمة كياني
يالشمس قبل انك معاهم تغيبين
اخذي الكلام اللي بطارف لساني
النور ماهو انك عليهم تمرين
النور نور العْقل.. وْلافيه ثاني
انتي حدودك نص عمر وتروحين
والعقل مايؤمن بوقت ومكاني
ياكم نهارٍ ما اوصلته الرياحين
قد راح لعبه بين مجني وجاني
والخير ماهو انْك لعالم تبينين
الخير تعطي من خذاك.. الاماني
لو كل خافي تقدر تشوفه العين
لا ما انخدع هاني بشوفة تهاني
يا الشمس مثلك بالشتا ينثر اللين
وبالصيف مايلقى لبحره مواني
لكن مدام انك عليهم تطلين
برحل عشانك... ما وصلتي عشاني