الجادل اللي جيتها طير قرناس
سجّل عذابي في خفوقي هدفها
زرعتها ورده لها روح وأنفاس
وجاها على درب الردى من قطفها
راحت معْه في.. باقة الناس للناس
مجهولتي غيري بسلمه عرفها
ما للعْمر بين المخاليق مقياس
أحيان تبقى روح ميّت انفها
اللي خسر ما ينفعه ضرب الاخماس
والخمس مبتوره بليّا شرفها
سميتها ماضي له لسان ملّاس
وكل العتب ماهو على اللي ولفها
ولاهو عليها يوم راحت بلا ساس
على الذي لجروح قلبه وصفها
اغنيتها وْطشت يديها للافلاس
عقب الأريج تْفوح ريحة سلفها
الحقد ما يضرب عليها بالأجراس
الله يهنيها مع اللي خطفها
متكاملة أول معايه ولا باس
قتلت بابياتي نهاية طرفها
الوردة إن ذبلت.. يجي يوم تندآس
وحتى الثرى له حق لو يلتحفها