لا والله الا تلاشى الليل
معاد يمشي على هونه
لا راح عودّ علي الميل
كني غريرٍ يلهونه
نجد العذيه جفاها السيل
والبدو دايم يخيلونه
يشبه مجيه مجي سهيل
اهل المحبه يحبونه
وين انت يا شمعة القنديل
ليالي الهجر ملعونه
كسرت متن البعير شعيل
يا ثقل حملك ويا هونه
لا عاد تدبل علي الكيل
نفسية الحر مجنونه
في بحر سودك يضيع الميل
من كبر عينك يقيسونه
والصدر كنه طلوع النيل
تفاحتينن وزيتونه
والخصر دايم عليه الميل
من كبر حملٍ يشيلونه
من كبر ردفه يبذ الحيل
زبدة صميلً يخضونه
اشوف فيها وصوف الخيل
صفرا من الخيل معنونه
كن الجدايل سبيب الذيل
لا قام يلفح على متونه
تلحق ملامه وتلحق ويل
وانا لو اصد ما اخونه
ابحث علومه مع اهل القيل
وانشد الي يمرونه
يا من سميه يبين الليل
ومع اول الصبح يطرونه
من كثرت الشوق مالي حيل
ازريت لا اعيش من دونه