مال اسراب الحمام ولات غربان
واغصان الزيتون ولات اشواك ضربان
مال الامواج تلاطم صخور الشطآن
مال الضو والظلام تعاشرو ولاو حنان
مالك يا وقت..او انت زمان غير زمان
مال القلوب قسات
تقول مخلوقة من احجار
مال الجورة تفقدات
ولا دار تعانق دار
المال ولى لات
ولا ثور بلا خوار
مال المصلحة ولات رسول وكتابها دولار
الانسان حار مابين النور وما بين النار
الظالم ظالم وكلشي مخليه فضلالو
والمغضوب عليه قابض على الدنيا بمالو
والمومن مقهور والظالم عاجبو حالو
ايلا يمن ولا يسر هذا عمو وهذا خالو
نسى قومو نسى اخلاقو نسى عيالو
السلام حكاية يحكيها على قهوة متقاعد
بقات تتناسى يحكيها واحد لواحد
خلاونا نقولو عليهوهم والكلام واجد
سلامهوم لي يستسلم ماشي لي يعاند
ولي يعوم ضد التيار يقولو مخو فاسد
مالك اخاطري صاحي
ماهزلك منام
مالك اقلبي ضاحي
ما شدك لجام
فطريق المحبة ناجي
ولا سكنت غرام
مالك اعقلي ساحي
ما قدك مدام
مالك انفسي ارتاحي
دابة تدرك لمرام
عييت ما نطلق نواحي
ولا من يقول حرام
درت الكلمة سلاحي
نوقظ بها الغشام
غير ما كثر تكلاحي
والما شربو الغيام
انا مطلوق لسياحي
والارض مزروعة الغام
ليلي يطلقني فصباحي
يا دنيا عليك خير وسلام