قرت عيوني يوم شافت عيونك
الله يعلم كيف كانت حزينة
حسبي على من حال يا حبّ دونك
أقفيت ثم أقفت وراك السكَينة
إن قيل سلوة، ما سلينا بدونك
كم ليلةٍ هاجت شجونٍ دفينة
وإن قيل نعمة، ما عرفنا نصونك
مع أنّ خيرك كلّنا خابرينه
ليت الزمن يرجع وننعم بكونك
ويملى ضياك دروبنا والمدينة
ونقول للأفراح هِلّي مزونك
واروي ضما قلبٍ تعب من حنينه
مير البلا كنا سبايب طعونك
وأنت اكتفيت من الغرق والسفينة
معذور في بعدك وربي بعونك
ما لي سوى طيفك أقبّل جبينه