نسيتني وأنت ما فارقت شرياني
وأصبحت منك وفيك بصمت منسيه!
أهديتني غربتي والقلب وحداني
من قبل أعرفك وأنا بالضيق مبليه
أدري كذبت ولويت بذكرك لساني
ولاحدٍ سألني عليك أقول موليّه!
حاولت اضلل عليك بزيف نسياني
وأنا أدري إن شمس حبك في الحشا حيه!
ولا أشتد عصف الجروح يكسّر أغصاني
أصدها وأنكسر قبل أرفع إيديه!
أغص فيني!! وأنا أشرب لجلك أحزاني
وأقول بكره لوجهك والفرح جيه!
علمتني لاضواني ليل حرماني
أذبح قرابين صبري وأحسن النيه!
علمتني كيف ما انسى يوم تنساني
وكيف أطرد غيوم صيف ٍ مالها فيه!
علمتني لادعاني الشوق وأشقاني
أحط موسه بصدري وأتبعه كيه!
علمتني لين جرحي منك أغناني
مهما تعاظم علي أقول يا حيه!
علمتني كيف ابرر فيك خذلاني
وأقبّل تراب حلم عنه منفيه!