بعض المواجع طوّلت في أمدها
لا صبر فاد ولا رجاوي تهدّي
الموت أغلى الناس هو من عقٓدها
ولأجل استريح أقص يدّي بيدّي!
بالله نفسك وش جنت من نكدها؟
واعزّتي كلٍّ خسر هالتحدي
ما بين مقصودة ومحدٍ قصدها..
دمع القهر وسّم بخدّك وخدّي!
بأسبابك أيام الفرح كم عددها؟
أصابعي أكثر وما غير أعدّي
من صغري الشيبات كلٍّ رصدها
حتى غدا راسي كما راس جدّي!
الناس قالت "عفّ نفسك تجدها"
وش حيلتي لا صرت نفسي وودّي!
الروح ما تنحسّ لو لا جسدها
أشهق بذكرك وأتلعثم بردّي
لأجل الكرى بطوي الهموم وسهدها
وأدفن جروحي مثل دفني لسدّي
اللي مضى أحزان ولّى عهدها
والعمر دربٍ للمنايا مودّي
يكتب لك الله عين تلقى سعدها
تحتار من زود الرضى وش تبدّي
ما بي سوى الجنة وصادق وعدها
والله يبيحك كثر ما جرْت ضدّي