ياراكب اللي مايكد المشاوير
ولا شال به راع المواشي شعيره
مقاضي المنزل لهن موتر ٍ غير
بالبايكه . . مثل السلاح بجفيره
موقفه تقدير ماهو بتوفير
وألليا بدا لي لازم ٍ قمت أديره
أفحص على الماطور وأفحص على القير
وعلى كفراته وجودة سبيره
والليا أشتغل قامت تهدر المواصير
هدير هرش ٍ مرقب ٍ له مديره
شرشوح ذود ٍ فيه حيل ومعاشير
يحدهن عن واديٍ فيه ذيره
وينفخ لهاته كنها دندنة زير
يبا يقوي هيبته في هديره
ومع الخرايم كن عجه معاصير
هوج الرياح العاتيات المثيره
اللي تطير بشرة الارض تطيير
لفحة هواها مثل لفح السعيره
صيفية ٍ تشوي نبات العثامير
القاع ينشف من هواها غديره
يسوق بقش البادية والمظاهير
من المظامي . . للعدود الغزيره
يمشي من العارض مقر المشاهير
نطاحة الكايد صقور الجزيره
والليا أنجلى وجه الدجى وأبصر الطير
وقام يتلذع وأستعد لمطيره
يطلع من الديره قبل زحمة السير
وينسف على يمناه قرية عشيره
يبتل عدال لملتقى الوشم بسدير
يمم مغيب الشمس وجهة مسيره
ملفاه من يصرف له ( النعم ) تكرير
الليا حل له بين الرياجيل سيره
عبدالله النايف سداد الشواعير
هذاك يسند له وذا يستشيره
الليا أنهمك بمحيرات التفاكير
لولاه غالي صابني منه غيره
يقطف بيوت الشعر قطف النواوير
من وادي ٍ ماولعت فيه نيره
نبي نزوره في مقر المغاتير
اللي لياجاهن تريح ضميره
ماهو بشاوي ٍ يربي القراقير
مايقني الا كل وضحى ً نظيره
ماهن هدايا من مواطن ولا أمير
فوقهن غير الحلق مستديره
أتلاد من وقت العصور المدابير
وعند القبايل سامعتهن شهيره
من دونها ( الروسان ) يوم المغاوير
ترخي مصارع كل قباً ظهيره
يناطحون مرملين الغنادير
الليا جت بهم صم الحوافر مغيره
عقب الطمع فيهم تضيق المعابير
ومن لا أمتنع منهم يواجه مصيره
وتضوي على بيت تجيه الخطاطير
على الجيوب الشهب من كل ديره
يجونه الزوار مثل المداوير
اللي تلاشوا بالسنين الأخيره
وقت ٍ مضى فوق الموارد طوابير
كل ٍ ينشد عن وسيمة بعيره
ماعمرها باتت دلاله مهاجير
مدهل وملفى للوجيه السفيره
والليا هرج خدر هل الذوق تخدير
سوالفه ذربه ولاهي كثيره
ماهو من اللي هرجته مالها نير
تمل منها الناس لو هي قصيره
والليا كرم مايذبح إلا ولد ضير
اللي سنامه نابي ٍ عن حصيره
الطيب من شانه كبار المخاسير
صغار عند أهل الحظوظ الكبيره
يصعب على الأنذال لوهم هوامير
ويسهل على أهل الجود لوهي فقيره