بعت لك الفين سلامات
والفين تحية وشوية
ونا على طول الأوقاف
ما شفت واحد من ميه
يخلصك تنسى ودي
والود كانت له أوقات
آخذ معاك فيها وأدى
واحضر عليك علم الواوات
أنا حسن واسمي حسنين
وكل أزجالي طازة
وفي الزجل صاحب لسانين
وكل واحد له عازة
لكن حرام يابن عمي
برضك بتسأل وتراعي
ويصح مني يا عمي
أطرف عيوني بصباعي
إن كنت آجي واديكم
أروح وارجع في نهاري
وإن بت ليلة عنديكم
أصبح على ظهر حماري
ولا أشوف غير القاضي
ولا ابنه عبد اللَه محمود
ولا أبوك إن كان راضي
وفي البلد قاعد موجود
أوعى تكون تحسب لي حساب
مع الجماعة أقرانك
منين أجيب لي وقت شباب
زي ابن عمك واخوانك
أفهم كلامي يا عمي
واعرف معاني مضمونه
وخلي بالك من يمي
وعهدنا أوعى تخونه