سِنْقِباسي ناشل الراسي
والهوى يَلوي عَلى زلوفه
خَوّروا وله ثوب مِدراسي
واستِحَى الخِوَّار مِنْ يُوفه
أتلع ادلع وَيهه اخماسِ
وقَدّ مَربوعٍ زِهي وْقُوفَه
يوم يِشرَب ما مِنْ الكاسِ
مِنْ تَرافَة يَنْبَه تْشُوفَه
شَمس وِنجومَه الجلّاسِ
لو زِهَن بالحسن ووصوفه
لو هو عاري وهِنْ بِلباسِ
هِن المحبا وهو قِمَر شوفه
الرِّجيب يغيب بِنعاسِ
والكثيب يغيب بِردوفه
نور خَدَّه بَدر الاغلاسِ
سوَى زلوف اللّيل وزلوفه
بين الالعاسِ خَمر كاسي
مِنْ فراقه هوب مَولوفه
شِفَق شَمس سلومها الماسي
مَا ادري دِرَّة وَجنَة خشوفه
يَن شِمَم ما ينّك اركاسِ
عين ألف ولام مَحْذُوفه
ما طِمَثْهِن طِفل بانفاسِ
لا ولا مَسَّتْهِن كفُوفه
بيتَه عالي ثابت الساسِ
والسحب تِنْشب عَلى رفوفه
ياني خَطَّه وِسط قِرْطاسِ
وانحِنيت اقَبِّل حروفه
كنّه لِمْبَشِّر وِصَل راسي
عِنْد يَعقوب ورِجَعْ شوفه
أو وِصَل موسى عقب ياسِ
فِيْ حضن أمّه الملهوفه
ارفَع كتابَه عَلى راسي
مثل تاج الملك وِزْفوفه
لا ألم لا هَمّ لا باسِ
آمِر ولِك نِحن فِيْ الشوفه
لِك غلا وِحروز حِرّاسِ
وحِشْمَه بالمِدراه مَحفوفه
غِنِى مِتْمَدِّن ومِتْواسي
نَفْسَه جَزْلَه هُوب مَخْفُوفَه
مِشْرِفٍ ما يشتكي باسِ
مِ الخلق والدَّهْر وِصْروفه
مِنْ فراقه ضاقَت اهواسي
ما يشَرِّف صوبي بلوفه
يِكسرون اليوز لو قاسي
إلا يوزْكُم صِمَّه يلوفَه
البشت سِنداله يجاسي
نِشْل لو دَقَّاتَه مَرضُوفه
تَرف مِتخرِّس وَلَد ناسِ
مِ الجواري الكِنَّس وصوفه
أفدي وَردٍ يَقطّف احواسِ
بكِل وَردَة حَمر مَقطوفه
قِصر كل طولٍ بِلقياسِ
عِند ليل الهجر وِظروفه
لو منعني الشرب والكاسِ
فِيْ يدي فَرّيته عطوفه
غِزر بَحرَه هوب مِغطاسِ
لَجّ دون القوع وِحروفه
عود دِمنَه وغِتل ميّاسِ
يِخجل الأغصان بِهزوفه
فايج وفايج على الناس
حِسن خَلقه ومَدَّة كفوفه
لا تخَوِّفني بالافلاسِ
الله يَمِّن قَلبك وخوفه