امس العصر مريت سوق الصناعة
وهاجت بي الذكرى وشبت قناديل
وفز الحنين .. وشاقني بإندفاعه
جاب المواقف والصور والمواويل
ورجعت لسنين الهدو والوداعه
ل حي الصناعة والرجال الحلاحيل
للشارع اللي ممتلي بالبضاعة
هذا ينزل حاجته .. واخر يشيل
وذكرت ربع ٍ يبذلون الشفاعة
متوارثين المجد جيل ٍ بثر جيل
بذكر بعضهم والعذر ياجماعة
صعب علي احصى قروم الرجاجيل
الخضير والعليط .. تواضع قناعة
وايضا المشاري والشدوخي ..واباالخيل
والغنيم والعبيدان .. طيب وشجاعة
والفايز والمرشود والحمود والسهيل
وعند الجعيثن والخليفة .. وداعه
والعمري والشقيران .. والبطي والحليل
وإلا الحسن هم والمشيطي طماعة
من طيبهم مع حسن خلق وتساهيل
والصقر والضالع .. عزوم وبتاعه
وجميع سكان الصناعة.. مشاكيل
ذكرت من حولي وبطلب شفاعة
من اللي نسيته .. واطلب العذر بالحيل
وماانسى السكيتي ومسجده والجماعة
عقب العشاء حوله تزين التعاليل
ومن مسجد الصايغ لنا كل ساعة
بعد الصلاة اصوات ذكر .. وتهاليل
وفي مسجد العشاب دين ٍ وطاعة
وفي مسجد العناز ذكر وتراتيل
وبختم انا قافي .. وبوقف يراعه
من شان مانغرق ببحر التفاصيل
الله على بريدة .. وسوق الصناعة
له حنّه ورنّه من الصبح ل الليل