بولتيكا
احنا بتوع البولتيكا
حنجل
منجل شيكا بيكا
نكدِب
ما الكدب سياسة
ندهِس
الأحرار بمداسة
نلعن
أبو مين لو يصدق
يِفْتِشْ عن عيِبنا وينطق
الصدق
فى عهدنا خيِبة
والشكوى
فى حقنا عيبة
إحنا
بتوع التطنيش
والهجرة والتطفيش
ووظايف
نو... ومفيش
نلغى
بطايق تموين
والدعم
نقول يا معين
ونتاجر
فى الممنوع
وكيماوى
يا إما نجوع
ونشلفط الإنتخابات
وطوارىء..حجز..نِبَات
أيام
وأشهر وسنين
حق
الإنسان راح فين؟!
النبى
يهديك ياحكومة
الشكوى
بقت بالكومة
هجانة
جوه وبره
عُملا لحاكم وحكومة
تستقوى
على اللى يصلى
وع القاتل؟!
جايبه.. برومة
الله
يجازيها..سين..سين
دى سياسه
زى الطين
بولتيكا
سياسه دا إيه؟
وآميه ع النخوة آميه!!!
دى عمايلك
فاقت فاقت
يا حكومة
شريفة عفيفة
نفسك
مع نفسك حاله
والناس
علىُ لقمَة خفيفة
النبى
تفرجها علينا
ل العصمة مش بإيدينا
مااحناش
أد.. البولتيكا
ولا كدب
الناس الشيكا
شاى
فى الخمسينة كتيروو
ولبيوتنا
نجرى نسرسب
ونعسل
كده م المغرب
والفجر
بندعى عليكا
ملعون
أبوو البولتيكا