ماتت..
لكن الأزمة مش هنا
ماتت..
من غير كوباية الشاي
بدون ما تلمس رمال الشط
ماشفتش القمر بوضوح
ولا شافت غزال من قبل
"ياما نفسي أزور سيدنا الحسين"
كانت الزيارة آخر الشهر
والشاي ع النار
الشمس كانت رايحة، والقمر جاي
يا ملك واقف ع الباب
مش كنت استنيت شوية؟
سنين بتبصلها كل يوم
وتقول لساكي شوية
قولتلك.. سايق عليك النبي
تقوله يكمل جميله
ويديها من العمر زيادة حبة
وعدي خلف، ولو كان بيدي
ما كنت خلفت
للسما.. رفعت إيدي وراسي كشفت
أرجوك لاء.. أرجوك لاء
كمان فرصة.. تشم هوا إسكندرية
وتتمشى ع النيل
مكنتش عايزة تزور باريس
كان نفسها تصلي في الحرم
تصليلك.. مش عايز صلاة؟
كنت سيبها تدوق طعم حاجة غير الوجع
هان عليك عياطها؟ عيّطها مرة من الفرح
كنت هتاخدها.. مستعجل ليه
كانت تفرح بس ولو سنتين؟
طب ليومين.. تنام من غير صراخ الزعل
رافض فكرة الرحيل
رافض إن الوضع يتقبل
الثورة قامت، لكن مفيش أمل
ماتت حزينة.. والأمر مفيهوش مرتجع
ماتت..
والأزمة إنها عاشت حزينة