حبيبة قلبي المغرم.. فديتك
نده قلبك على قلبي.. وجيتك
لقيتك حلم لوّن لي حياتي
كأني كنت ادوّرك ولقيتك
كتبتيني ب دفتر أمنياتك
وانا في مورق أحلامي قريتك
جنونك صمتك أحلامك فضولك
هدوءك اشتعالك لا ظميتك
حنانك عطرك المسكوب فيني
رحيق احساس وردك لا انتشيتك
فضاءك عالمك سحرك خيالك
كأني معك عايش وسط بيتك
أحبك.. إيه أحبك!.. ليه أحبك؟
لأني كثر ما اعطيتك.. خذيتك
أغني بك صباحات المحبة
واضمك ف ابتسامك لا غفيتك
وانا مشكلتي إن قلتي: أحبك
أضيع! وما أقول الا فديتك