ولك يسعد أبو ترثة هلك قلي وش اكتب فيك
مادام الشعر من فرحة خفوقي صابته سكته
طبيعي مثل ماقلبي يحرّك نبضته طاريك
مسار الشعر في حكمك تقلّ وتكثر حركته
مثل مااغليك وافرح بك بعد يفرح بك ويغليك
لذا أرجوك تستحمل عبط شعري ، وصعلكته
( فشر ) يئدر بشر يحكي علينا هيك والا هيك
شياطين الحكي ، تسكت اذا حضْرت ملايكته
انا اكره ماعلي اكتب ( غزل ) لكن عشان ارضيك
أبدخل مملكة غيري واباخذ عرش مملكته
عشانك بحرق اشباه القصيد بصاعقه واسقيك
زلال الشعر في قلبك عسى الله يطرح بركته
( تفشخر ) شاعرك ( شبل الشظايا ) واعتقد يكفيك
تملّك ( ذوقك الفاخر ) وفالآخر تملّكته
لأنك تمتلك فوق المزايا موهبة تكتيك
قدرت تصيد لك طيرٍ يخمّ النقل بشبكته
ولأنك مختلف جداً ولا أية شعر يغريك
زرعت الخوف في ، قلب القصيد وفعلا اربكته
ولأنك جيت شاريني قبل عرفي لزوم اشريك
هلابك بالخفوق اللي من الوحشه تداركته
أحبك كثر ماودك تعرف شكثر افكر فيك !!
كثر مالنوم من عيني على ماقيل ( جمركته )
أنا من غير مااكتب بك قصايد ، ربنا حاليك
معاك الشعر يستسلم قبل لااخوض معركته