زقة معانا و النبي

زقة معانا و النبي!!

اسند يا عم أمين!!!ِ

السد هال!!

والقُطبة نشفت كلها ع الشقيانين

ما فيهاش سوى .. فردة مقص .. و خنفسة .. مع تِعبانين

والبير نشف .. و الناف من الهدية اتخلع ..

وما عادشي ريقي بيتبلع

والمغربية مطولة ع العطشانين

فكرك نكمل في الغلط؟..

يبقى عبط

فكك بقى من الدروشة

وكفاية شغل الحنكشة

دي ورطة باينة محبشة

وكلام قالوه ع اللي اختشى من بنت عمه من سنين

امسك خيوط المسألة

وكفاية هيصة و حنجلة

والمعضلة دي كلها ..

تلقى خيوطها مهلهلة

والغَرزة تلقى حلها

خشن لها .. و انشف لها

والزقة تبقى من إيديك

والسد لو هال .. اسنده ..

اغرز وتد رجلك وراه ..

لو حتى رجلك تنخلع .. ما تقولشي آاااه

والقُطبة لو نشفت عليك

ما لقيت سمك ...عكرها حبة تروق

صحصح يا عم فاروق

تلقى القناني تروق

خليك فطين

اعمل رفاعي .. وابتدي لم الأفاعي

والخنافس منها لحالها هتهرب .. في الشقوق و الطين

والقُطبة تنضف حبتين

هتلاقي فيها كتير

دا البير على مد العصور

تحته عيون .. بتنز خير

والناف على راس العامود

قوم ركّبه .. واربط عليه بالعزم .

واعقُد عقدتين

مسمار جحا ما لوش لزوم ..

ارميه، ولا تسمعشي لوم

الحالة دي .. ما عادشي ينفع يتلبس فوقها هدوم

غول المجاعة المنتظر

يسقط معاه .. معنى الزكاة .. و الصوم

يوم السفر .. دا بألف يوم

ما فيهشي صوم .. للتعبانين

والعصبجية في الطريق

خسران حقيقي ..

.. اللي ياخدهم له رفيق

فوق يا جدع

فتح عنيك

ما عادتشي تنفع طبطبة .. فَتح عنيك

تلقى حيتان المهيصة

والناس بتوع اللغوصة قالوا فكيك

خليك حريص

السكة لسة مطولة

والناس بقت متبرجلة

راميين حمولة حلمهم كله عليك

نشّف إديك في الطبطبة

نشف إديك