خدعتنا يازين حتى هويناك
وكنا على كل المخاليق نغليك
الله قسم لك عندنا الحب وأعطاك
ومفروض تشكر نعمته يوم يعطيك
ياما سهرت الليل ويطيب ممساك
وإن نمت ساعه جاك طيفي يناجيك
أنا الذي يوم أنت مهموم سلاك
واليوم تنسى اللي كلامه يسليك
ياليتنا ياصاحبي ماعرفناك
خيبت ظني يالغضي والرجاء فيك
كنت أتحرى يوم شوفك ولقياك
واليوم ما ودي بدربي نلاقيك
مايستحق الحب مثلك وشرواك
يهناك ما حصلت منا ويكفيك
قطعت مابيني وبينك بيمناك
الله بما سوت يدينك يجازيك
شارك عديم الرأي وأعماك وأصماك
الله يزيدك من ظلاله ويعميك
شور الردي هانك وجابك ووداك
والعالم الله واين رايح يوديك
ربي كشف سترك وبين نواياك
تلعب على الحبلين من دون تكتيك
من عذبه حبك مع الوقت ينساك
لكن ما ينسى علومك وماضيك
لو ننشر الأخبار ياكبر بلواك
تصبح كما السلعه نبيعك ونشريك
هذا كلام ياصلك ويتعداك
وتشوف بعيونك وتسمع بأذانيك
إن كان ودك نستر العلم ياذاك
أقصر كلامك قبل نهرج ونوذيك
أنا أعرف أسرارك وعارف خفاياك
وأمسك رجول الديك تاجيك بالديك
لكن مابمشي على نفس ممشاك
وخله يفيدك من برايه يمشك