يسال عن أحوالي وهو عالم الحال
إن الوضع زي ما تركنهن يدينه
القلب بعدك خاويً مثل الأطلال
متحسر ويسراه تصفق يمينه
ابني طموحات ومشاريع وآمال
بس الزمن دايم يخيب ظنينه
البارحة شفت العنى شفت الأهوال
شفت التعب من عقب ذيك السكينة
علمً لفاني شدّ يدي بالأغلال
واهتزت ضلوعي وطاحت سجينه
سبحانه اللي بدل وغير الحال
من عقب زين العمر ياتيك شينه
يوم المسافة بيننا بضعة أميال
لاغبت عنه فت قلبي حنينه
والحين ست سنين غربه وترحال
اشتاق له وسيوف صده سنينه
ما عاضني في طول صدته الأبدال
خليت قلبي لاجل حبه رهينه
هيجنت من جور الغرابيل موال
العود منها صار يبكي رنينه
يوم البحر يلطم من الجال للجال
من كبر قلبي ما ركب بالسفينة
يرضى الضما ما عاش في منة ظلال
يرخص لجل عزته سعر الثمينة
ودامك غديتي ستر فيه وجه رجال
ترا اصغر اعذار المفارق سمينه
لا صرت اقدر ردت الدمع لا سال
ما أنساك وانتي للمفارق وتينه
ما دام بتلى عزوةً لابن هذال
تبقين من بين المحاني دفينه