ياشيخ أنا فاقد مواليف واحباب
علمي بهم قبل العشاء فارقوني
باعوا مودتنا بلا علم واسباب
وانا احسب إنهِم بالغلا يشتروني
راحو وخلو هجرهم ضيق سكاب
في داخلي همٍ قضى في عيوني
ياليتهم بالوقت مازادو إغياب
ياليتهم مازودو في طعوني
ياليتهم باقين احباب واقراب
ياليتهم ياليتهم.. يسمعوني
طيّرت من عيني تلاويح واسراب
تنثر حنيني في مساحات كوني
ولقيتني من ضيق الايام مرتاب
اسأل عليهم وحدتي في ظنوني
واعاتب الاحساس لا جاء ينساب
في خِلسته ماهو عليّه يموني
يجرح مشاعر فقدها مابعد طاب
يروي ضماه ويسكبه في جفوني
يغرس طويله بالحشا داخلي ناب
وتتقطع الحيلات تضعف إمتوني
وانا على قسواه بالحتف منصاب
في ذمتي ارتاح لو يرجعوني!!
هذي اماني والاماني لها ابواب
تقفلت من يمهم حيل دوني
وبقى السؤال الي به الوصف ينجاب
وشلون هانت عشرتي وإتركوني؟