لو كان يعوضنى "الهوى"
عن كل "عصيانك" ف وقت
احتجتلك... مانصفتنيش
حبينى قد ما تقدرى... واستغفري...
من ذنب عاشق "تهمته" عاوز يعيش
ومكتفاه بالحلم من "باب" العشم
بين "طوق" و"ريش"
"خمسين سنة" ميت ف حبك بالحياة...
وما كفاكيش... !!
"خمسين سنة"...
بيشوف شقاوة ضحكتك "حادث جلل"
بيهد أركان الوجع... وكأنها طوق النجاة
كانت كاسات الصبر من إيدك أمل
كان احتمال الموت ف أحضانك حياة
"خمسين سنة" وإنتى الحبيبة الملهمة
كل القصايد... رغم "صدك"... مرغمة
تطلع تجلجل ف السما... وما تسمعيش... !!
يحزن لان الشعر منك كان مدد
كانت بحوره من عنيكى تفيض كلام
ضل ابتسامتك رقوة الروح والجسد
تنزل على كل الجراح برد وسلام
كان كل ليلة يحنلك
يدخل على نوبة "بكا"
وإيدين ملايكة تمس روحه الطيبة
يصعب علي نفسه الجدع
علشان دموعه قريبة... !!
كان لما يشتاقلك يدندن بالغنا
تمسك نجوم الليل نايات... !!
وساعات يبكيها الغنا... !!
وتسح من عينها الدموع متسرسبة...
"ترجم" شيطان الشعر لو يوم يجهلك... !!
"خمسين سنة"
مبقاش فاضله م السنين
اد اللى راح يامؤمنة... !!
"خمسين سنة" ماسك تلابيب الأمل
ويوم مانبقى عين ف عين
وإنتى اللى من ضلعى انا...
معرفتنيش... !!