يا ليت لك ورا سؤالك مصاليح
يا ناشدٍ قاسي سؤاله كواني
ب أجاوبك ب إحساس وافهم ب تلميح
أنا الغريب الي جفاني زماني
ولولا مخافة خالق الناس لا أصيح
أنا الوحيد الي القدر ابتلاني
وأنا الذي محتاج دربه ل تصحيح؟
همي وغربالي وياسي غزاني
وإذا تبي يا ناشدي زود تصحيح
أنا الذي درب التعاسة خذاني
أبي اعترف وادلي واقرر بتصريح
مقتول في عيني بحريق الأماني
الناس واسوا بالخزامى وأنا الشيح
أشم ريحة كنها الزعفراني
قلوبهم تحتاج غسلٍ وتشريح
يستهزئون ب ساميات المعاني
معهم حرمت من الهنا والتفاريح
وش عاد باقي يالخبيث الهداني
تزعزعت أقدام رجلي وابا أطيح
ما عاد لي بين الخلايق مكاني
أحلام كانت شالها عاصف الريح
وش حيلتي لا صار وقت عصاني
عايش على ذكرى ليالي مراجيح
يا ليت ربي من هواها حماني
ولا عشت عاشق مولعٍ جاه تجريح
من واحدٍ ما ذاق طعم الحناني