الجنة فاتحه الباب
ياعيونك كوزين فضا
والصدر سجاده
خلينى اتوضا
واركع وأسجدلك
ليكى الصلاة سنّه
ريحة كافورك فايحه ف غيطانك
فياحان نسيم الجنه لمايطل
على نيلك وأهرامك
ويشد من عزمى ف لحظة ضعف وجبانه
ف اهب طالب تارى
وأعدى
للموت فاتحه له الصدر
مش خايف
بلاش مخايله ياموت
شايفك
وجايلك قصد
وناويلك
هل من مبارز
يبارز صحوتى وقومى
وانا لسه متوضى
ولسايا على صومى
حالف مأفطر غير والراية مرفوعه
ومخذّقه عين العدو التانيه
يأرض ياأرضى
استحملى دوسى ودبدبتى
وزلزالى ودبابتى
وانتى اللى خضتى
م الحروب ياما
ولساكى كما انتى
قامتك تطاول شموخ الشمس بولادك
جايلك ياتارى يانارى
خدنى ف رحابك
انا من سنين واقف على بابك
لاهنالى طعم الزاد ولا نومه
هاتف وجالى
وقالى دى قومه
نفضت طولى وصوتى
وقلت الله
حان النزال والشرف
والجنه فاتحه الباب
ريحة الشهيد المسك والعنبر
شافه النبى
كبّر