قرب لي الأقلام والقرطاسي
ناوي أعبر عالورق باحساسي
تعبير عاللّي شفته ولامسته
من فعل شيخٍ وافيٍ نبراسي
سيف الذي فارِق على اقرانه
ابن بطي يا طيب ذاك الساسي
شهمٍ كريم ٍوالمدح يزها به
فعله تجلى بين كل الناسي
داعم لموروث الوطن وابنائه
دعمٍ كبيرٍ صعب ما ينقاسي
مالظفره لين عمان ويا الوسطى
ما يحصي فعوله سطر كراسي
عشق الهجن مترسخٍ في دمه
ويطيب له مع ذوده المجلاسي
يشري من فحول الجزيره ندّر
ياللي هديره كنّه الرجاسي
في شف بدوانٍ تعنوا صوبه
ما حط دون شبوكهن حراسي
وينقل طيورٍ للقنص موصوفه
خذن من اطباعه قويه باسي
ويطرب لقاعٍ خالي ما داجت
رجل الشواوي فيه والعساسي
ومن الثمار اللي يطيب حصاده
عنده من اطياب الفسل واغراسي
خلاص ونبته سيف والسلطانه
ولولو واحلى ذوق فالدباسي
من حلم معنٍ فيه مع اوصافه
واما ذكائه فاقَ ابن إياسي
ورايه يرجّح كل راي محنك
لله دره حازمٍ وسياسي
وربي خلق لعباد وزع رزقه
ما فيهم اللي فالخلُق متواسي
وانته يبو محمد وكل شايف
معدنك فاق الجوهر الالماسي
الله يديمك للمكارم قدوه
وتبقى حياتك في فرح واوناسي
والشعر نعمه من كريمٍ رازق
وانعام ربي مالها مقياس
انخصبه للي صفاته مثلك
يا كاسب الأمجاد والنوماسي